Ikipe y’Umurenge wa Ngarama yatsinze Umurenge wa Muhura ibitego 4 kuri 1 kuri finali y’amarushanwa y’umupira w’amaguru Umurenge Kagame Cup 2023/2024 ku rwego rw’Akarere ka Gatsibo.
Uyu mukino wabaye kuri uyu wa 12 Mutarama 2024 wabereye ku kibuga cy’umupira cya Kabarore, aho aya makipe yagombaga kwishakamo iyegukana igikombe cy’aya marushanwa.
Intsinzi y’Umurenge wa Ngarama y’ibitego 4 harimo 2 yabonye kuri penaliti yayihesheje igikombe, inayiha gukomeza ku rwego rw’Intara y’Iburasirazuba, aho yaserukanye n’iya Muhura ya kabiri mu bahungu, ndetse n’iy’Umurenge wa Gitoki yatsinze iya Gasange ibitego 2 kuri 1 byayihesheje igikombe cy’iri rushanwa mu kiciro cy’abakobwa.
Aya makipe azahura n’ayatsinze mu tundi turere two mu Ntara y’Iburasirazuba bahatanira guhagararira iyi ntara.
Umuyobozi w’Akarere ka Gatsibo, Gasana Richard wari umushyitsi mukuru yavuze ko bari gukora ibishoboka byose ngo amakipe yo muri aka karere azahagararire intara neza anatware igikombe mu rwego rwo kwimakaza imiyoborere myiza.
Yagize ati: “Kuba akarere kacu, umwaka ushize twarageze kuri finali, n’ubu ni byo twifuza, byanakunda tukabona igikombe. Ubu dufite n’amahirwe, amakipe yacu abiri yombi yageze kuri finali, azaserukira akarere ku rwego rw’intara, birashoboka ko yanakomeza akagera n’ahandi, ariko biba ari imbaraga.”
Asobanura ko kubura amahirwe kuri imwe bashobora kugira amahirwe ku yindi, ati: “Kandi mwabibonye ko ari abana bato, bakina umupira mwiza. Icyo dukora nk’ubuyobozi rero ni ukubaba hafi, tukabashyigikira, tukabaha ibishoboka byose, ibitunga imibiri yabo, morale nk’uku nguku…”
Yakomeje avuga ko iri rushanwa riri mu miyoboro myiza akarere kanyuzamo ubutumwa butandukanye, yagize ati: “Ubundi insanganyamatsiko ivuga imiyoborere myiza, na twe turayikeneye nk’uko n’ahandi hose ikenewe, hari ukurwanya inda ziterwa abangavu, ngira ngo murabizi ko ari ikibazo dufite muri ka karere kacu kandi imibare irimo iragabanuka. Dukomeje rero kugenda tugabanya iyo mibare kubera ubukangurambaga nk’ubu n’ubundi bw’urubyiruko, hari ubwo twavuyemo bw’amezi atandatu, byaradufashije cyane. Ikindi ni uko tubona uko tuganira n’abaturage bacu gahunda za leta, bakamenya ikigezweho.”
Insanganyamatsiko y’aya marushanwa mu Karere ka Gatsibo igira iti: “Twimakaze imiyoborere myiza, umuco wo guhiga no guhiganwa, turwanye inda ziterwa abangavu, n’ibiyobyabwenge mu rubyiruko,” gusa kuri iyi finali hatangiwe n’ubundi butumwa burimo kurwanya imirire mibi mu bana, Gerayo Amahoro, n’izindi gahunda za leta.
N’ubwo uyu umukino w’abahungu warangiye ikipe ya Ngarama itwaye iya Muhura igikombe, yombi azakomeza ku rwego rw’Intara y’Iburasirazuba, aho azahurira n’ayo mu tundi turere yitwaye neza.
Iyi Kipe y’Umurenge wa Ngarama isanzwe ifite agahigo ko kuba yarageze kuri finali y’Amarushanwa Umurenge Kagame Cup ku rwego rw’igihugu, aho mu mwaka ushize wa 2022/2023 yasezerewe n’ikipe y’Umurenge wa Nyarugenge yanegukanye iki gikombe.
