Imiryango 16 yo mu Karere ka Gatsibo mu Murenge wa Kiziguro, Akagari ka Mbogo yahoze ibana mu makimbirane yafashe icyemezo cyo kuyasohokamo no gusezerana byemewe n’amategeko; nyuma yo kwigishwa ikayavamo.
Ni imiryango yigishijwe n’umushinga Plan International Rwanda , aho basobanuriwe uko bakwirinda amakimbirane mu mushinga wiswe “Umugabo Nyamugabo.” Umushinga wari umaze amezi arindwi, wigisha imiryango yabanaga mu makimbirane ukaba wasojwe higishijwe imiryango 160 kwikura mu makimbirane kugira ngo babashe kwiteza imbere.
Bamwe mu basezeranye bavuga ko bakiri mu makimbirane bahoranaga umwiryane udashira bityo ntibabashe kwiteza imbere.
Umugabo umwe mu miryango yasezeranye yagize ati: “Njye nari umusinzi nkajya ngera murugo nkarwana ,umugore akirirwa yahukana, ariko ubu aho twigishirijwe narakijijwe n’ inzonga narayiretse; nishimira ko twavuye mu makimbirane.”
Umugore bashakanye yagize ati:” Murugo hari umutekano mucye buri munsi nahoraga nahukana umugabo yataha yasinze ubwo tukarwana nkahorana impungenge z’urugo, ariko ibyo byose byararangiye.”
Umuyobozi w’Akarere ka Gatsibo wungirije ushinzwe imibereho myiza y’abaturage Mukamana Marceline, avuga ko urugendo rwo guherekeza iyi miryango yasezeranye rukomereje ku kuyiteza imbere.
Ati: ” Icya mbere twishimira ni uko aba basezeranye uyu munsi bakoze urugendo, hari ibyo bigishijwe hari n’umwanditsi w’irangamimerere ku bigendanye n’ingo zibana zitarasezeranye ariko banakurikiranye inyigisho bahawe na Plan muri gahunda y’Umugabo nyamugabo.”
Uwo muyobozi yakomeje avuga ko Akarere gazakomeza gukurikirana ko iyo miryango itazongera gusubira mu makimbirane muri gahunda gasanganywe mu inshingano.
Akomeza agira ati: “Imiryango ibaye mu bukene hari amahirwe atandukanye yo kubahugura, hari abakora imishinga iciriritse, hari abahabwa akazi muri VUP ariko icyo twishimira gikomeye cyinaduha icyizere ni ubumenyi bafite bagiye bakura muri ibi n’amasomo bahawe.”
Ubuyobozi bw’Akarere ka Gatsibo butangaza ko bukomeje kwigisha no gushakisha indi miryango ibana mu makimbirane kuyavamo, aho kuri ubu kuva uyu mwaka wa 2024 watangira habarurwa mu Karere kose imiryango ibana mu makimbirane igera kuri 714.
