Mu bice bitandukanye by’Akarere ka Gatsibo habarurwa hegitari zigera kuri 403 zimaze kwibasirwa n’icyonnyi cy’imyaka iri mu butaka kizwi nka ‘Mukondo w’inyana’, Ubuyobozi bukaba bugira abahinzi inama yo kujya batera imbuto ihungiye no gukoresha ifumbire y’imborera iboze neza.
Ni nyuma y’uko muri aka karere hagaragaye icyonnyi cyitwa Mukondo w’inyana gifata ibihingwa bikiri mu butaka ntibibashe kumera, abaturage batuye aho iki cyonnyi kibasiye bavuga ko bahinze imyaka yabo ikaba yaraheze mu butaka, aho batera imbuto ariko bagategereza ko izamera bagaheba.
Mukondo w’inyana ni icyonnyi kiza mu butaka gifite umwihariko wo kwangiza ibihingwa byose bitewe mu butaka ntibibashe kumera bitandukanye n’ibindi binyabuzima biba mu butaka kuko byo bifasha imyaka gukura neza.
Bamwe mu baturage MUHAZIYACU yaganiriye nabo bavuga ko ubu baraye ihinga kubera iki cyonnyi kuko bateye ariko ntibimere, nk’uko bigarukwaho na Nzayirwanda Gedeon wo mu murenge wa Kabarore ati: “Ubundi njye ibi bintu natangiye kubibona kera, uyu mwaka ni uwa gatatu ariko byatangiye ari bike umuntu agahinga bimwe bikamera ibindi bikanga gusa ubona bidakabije, ariko uko iminsi yagenda ishira bikagenda byiyongera none ubu nta kintu kirimo ubu narateye ariko ntegereza ko byamera ndaheba, maze guteramo inshuro nyinshi mpinduranya imbuto ariko byaranze burundu.”
Umukozi ushinzwe ubuhinzi mu Karere ka Gatsibo Udahemuka Bernard yavuze icyo cyonnyi gihari ariko ko bari kugerageza kugihashya, aho bagira inama abaturage y’uburyo icyo cyonnyi bakirinda.
Yagize ati: “Ubu ngubu turi kugira inama abaturage y’uko bakirinda iki cyonnyi bakoresha ifumbire iboze neza, guhinga ubutaka bakageza kure ku buryo bworoha ndetse no gutera imbuto ihungiye kugira ngo icyo cyonnyi babashe kugihashya kuko ni icyonnyi nka nkongwa n’ibindi n’uko cyo kiba mu butaka.”
Yakomeje kandi avuga ko ubundi uyu Mukondo w’inyana wahozeho ntugire icyo utwara ibihingwa, ariko ngo ubu wiyonyereye hakazamo no kwangiriza ibihingwa ariko bije vuba.
Ubu mu mirenge 14 igize Akarere ka Gatsibo iki cyonnyi kimaze kugaragara mu mirenge umunani hakaba habarurwa hegitari zigera kuri 403 zimaze kwibasirwa nacyo.
