Ubuyobozi bw’Ikigo cy’amashuri cya Bibare bwatangaje ko abanyeshuri barindwi bakubiswe n’inkuba yagiye ibababura ku mubiri bari barwariye ku kigo nderabuzima cya Muhura bamaze gusezererwa, hasigaye umwe.
Ku gicamunsi cyo ku wa Gatatu tariki ya 15 werurwe 2023 ubwo imvura nyinshi yumvikanyemo inkuba yagwaga mu Karere ka Gatsibo nibwo inkuba yakubise mu kigo cy’amashuri cya Bibare giherereye mu Murenge wa Muhura, igakubita abanyeshuri barindwi biteguraga gukora ikizamini, ariko bagira amahirwe yo kurokoka.
Nizeyemariya Mary Goreth Umuyobozi w’iki kigo yabwiye MUHAZIYACU ko inkuba yakubise abana barindwi bagahita bajyanwa kwa muganga bakitabwaho, ndetse batandatu bamaze gusezererwa hasigaye umwe, ariko nawe atarembye cyane kandi abandi bakomeje gukora ibizamini nta kibazo.
Ati: ”Abajyanywe kwa muganga ni abana barindwi inkuba yagiye ibabura bari bafite ibikomere, abana babashije kubona ubutabazi ubu tuvugana batashye, usibye umwe bari bajyanye i Kiziguro (mu bitaro), ariko nawe navugaye n’umubyeyi we, yambwiye yuko ameze neza nta kibazo, ariko impamvu yatumye bamujyana nuko yarutse bakavuga bati reka bamujyane ku bitaro bikuru akurikiranwe barebe, ariko ubu ntakibazo nawe afite.”
Yakomeje agira ati: ”Abana ubu nta kibazo bafite, bamwe bagiye gusoza ibizamini abandi babisoje, mbere y’uko babijyamo twabaganirije tubarema umutima ku buryo bagiye mu kizamini nta kibazo bafite.”
Umunyamabanga Nshingwabikorwa w’Umurenge wa Muhura Ndayisenga Jean Claude yashishikarije abaturage ko muri ibi bihe by’imvura bajya birinda kujya ahantu hashobora gushyira ubuzima bwabo mu kaga .
Ati: ”Ubundi dushishikarizwa ko mu gihe cy’imvura gukoresha ibikoresho by’ikoranabuhanga n’ibindi bishobora kuba byakurura inkuba atari byo, ahubwo abantu bakwiye kubireka, ikindi hari uduce biba bigaragara ko hakunda kwibasirwa n’inkuba, nk’igihe imvura iguye kwirinda kujya munsi y’ibiti, ku mbaraza n’ahandi hari imyuzure n’imigezi, ahaba hari imivu iri gutemba, bikwiye ko abantu birinda kuyijyamo, bagomba gutegereza ikabanza ikavaho, kuko nabyo bishobora gushyira ubuzima bw’abantu mu kaga.”
Ubuyobozi bw’iri shuri buvuga ko hari imirindankuba kandi igihe iyi nkuba yakubitaga nta muriro w’amashanyarazi wari uhari bavuga ko wayikuruye, abanyeshuri bakubiswe n’iyi nkuba bari mu kigero cy’imyaka 16 na 17, ikaba yanangije inzugi z’ibyumba bibiri yakubiseho.
