Mu myaka igera kuri 5 umushinga wa USAID Soma Umenye umaze ukorera mu Karere ka Bugesera muri gahunda yo gufasha ibigo by’amashuri mu kuzamura ireme ry’uburezi hibandwa mu kwigisha gusoma neza ururimi rw’Ikinyarwanda abana bo mu mwaka wa mbere kugeza mu mwaka wa gatatu, aho Ubuyobozi bw’Akarere buvuga ko byatanze umusaruro ku buryo bufatika.
Umuhoza Solange yiga mu Kigo cya G.S Nyamata Catholique mu mwaka wa 3 w’amashuri abanza.
Uyu mwana w’imyaka 10 y’amavuko usoma neza ikitabo cyo mu mwaka yigamo, avuga ko biterwa n’uko ku kigo yigaho haba ibitabo byinshi byo gusoma kandi ko n’abarimu babo babibashishikariza kenshi.
Ati: “Turasoma kuko baduha ibitabo kenshi, kuko twiga no kuva mu wa mbere babiduhaga buri munsi ndetse tunageze mu wa kabiri bakajya baduha ibindi birimo inkuru zitandukanye. Rero tumaze kumenyera kwisomera inkuru zo mu bitabo.”
Giraneza Gad w’imyaka 8 na we wiga ku Kigo cya G.S Nyamata Catholique, yaganirije MUHAZIYACU ku byo amaze kumenya gusoma ndetse no kwandika.
Uyu Giraneza asubiriramo bimwe mu bihekane bamaze iminsi biga, akanatanga ingero z’interuro zirimo ibyo bihekane, nk’aho yasabwe n’umunyamakuru gutanga urugero rw’igihekane no kugikoresha mu nteruro akagira ati nka ‘NK’- inkoko, inka inkende na ‘BW’ati: mpwituzi agira ububwa.”
Uyu munyeshuri wiga mu mwaka wa kabiri avuga ko umuco wo gusoma yawutangiriye mu mashuri ya ‘Nursary’ akagenda abimenya buhoro buhoro uko yigira imbere mu mwaka.
Ati: “ Nabitangiriye muri ‘Gardienne’ nkomereza no mu wa mbere, kugeza no mu wa kabiri n’ubu ngubu aho ndi barabinyigisha.”
Aganira na MUHAZIYACU, Umuyobozi w’agateganyo w’Akarere Bugesera, Mugiraneza David, yagarutse ku ruhare rw’uyu mushinga wa USAID Soma Umenye wagize mu Karere ka Bugesera, ashima uburyo abana bo mu mashuri abanza kuva mu mwaka wa mbere kugeza mu mwaka wa gatatu baba bazi gusoma neza Ikinyarwanda.
Muri iki kiganiro kandi yagarutse ku kuba hakiri ababyeyi badaha umwanya uhagije abana babo ngo basubire mubyo bize, bityo ko bagiye kubibakangurira babinyujije mu nteko z’abaturage.
Ati: “Iyi gahunda yadusigiye umusingi mwiza ku buryo izagera no mu bindi bigo igashinga imizi”.
Yongeraho ko mu rwego rwo guha umwanya wo gusoma abana, ababyeyi bakanguriwe kubaha umwanya ati: “Turasaba ababyeyi kujya baha umwanya abana kugira ngo basubiremo ibyo bize bityo bakarushaho kuzamura ireme ry’uburezi”.
Ubwo harebwaga impinduka za gahunda ya Soma umenye y’imyaka itanu imaze mu Karere ka Bugesera, Jonathan Kamin Umuyobozi wa USAID Soma Umenye yashimangiye ko buri mwana w’Umunyarwanda wese agomba kugira amahirwe yose mu kumenya gusoma neza bitewe n’ubufatanye buri hagati y’Ikigo gishinzwe uburezi na Minisiteri y’Uburezi ndetse n’Akarere.
Yagize ati: “Twese hamwe dushobora guteza imbere abasomyi b’iki gihe kugira ngo babe abayobozi b’ejo kandi ndizera ko mwese uko muri hano, yaba ari REB, Minisiteri,Ubuyobozi bw’Akarere kandi ndabyizeye cyane ko ubufatanye ni ikintu cy’ingezi kuko abashyize hamwe ntakibananira.”
Ngoga Eugene ni umukozi mu Kigo gishinzwe uburezi bw’amashuri abanza n’ayisumbuye_ REB yavuze ko iyo umwana agize umuco wo gusoma bimuha amahirwe yo gukura ashoboye kwiga neza kandi abishishikariye.
Ati: “Uretse nuko twabonye abana byabafashije bazi gusoma, bakurikirana, ariko buriya birabaha n’amahirwe yo gukomeza kwiga neza no kuzagera ku ntego zo kwiga”.
USAID Soma Umenye yafashije ibigo by’amashuri gukoresha abana isuzuma rigamije kureba igipimo bagezeho. Iyi gahunga kandi yitezwe kugezwa mu bigo byose byo muri Bugesera ndetse n’ibyo mu tundi turere uyu mushinga utarageramo.
Uyu mushinga watanze inkunga ingana na miliyoni 77Frw, ibitabo bisaga miliyoni 6 n’izindi mfashanyigisho zigenewe abarimu n’abanyeshuri mu Gihugu.
