Umuyobozi w’Akarere ka Bugesera, Mutabazi Richard kuri iki cyumweru ubwo hizihizwaga umunsi wo kwibohora kunshuro ya 27, yifatanyije n’abaturage bo mu Murenge wa Ntarama gutaha ku mugaragaro ikigo cy’amashuri gishya bubakiwe nyuma yaho abana babo bakoraga ingendo ndende bajya kwiga.
Ni ishuri rishya ryahanzwe mu mwaka ushize ubwo hubakwaga ibyumba birenga 800 muri aka karere, iki kigo cya G.S Cyeru cyubatswe gifite ibyumba by’amashuri 15 kongeraho n’ubwiherero 18.
Ku ikubitiro cyahise cyakira abanyeshuri 780 bigaga mu mashuri ari kure aho basabwaga kugenda ibirometero byinshi.
Bamwe mu babyeyi baganiriye na MUHAZIYACU bavuze ko bishimira iri shuri bahawe hafi yabo ngo kuko abana babo bakoraga ingendo ndende bajya kwiga mu tundi tugari turi kure yabo.
Yesarakiza Gilbert utuye mu Mudugudu wa Cyeru mu Kagari ka Kanzenze mu Murenge wa Ntarama, yavuze ko bishimishije kwizihiza umunsi wo kwibohora abana babo biga hafi bitandukanye na mbere, yavuze ko bibafasha mu kubakurikirana bakabasha gutsinda neza.
Yongeyeho ati: “Inyungu za mbere ku kuba bahiga ni uko biga hafi, ikindi cya kabiri biratworohera kubakurikirana kandi bikanadushimisha kuba hari ibikorwaremezo byatwegerejwe mbere yo kwishimira umunsi wo kwibohora, turashimira Leta cyane.”
Umuyobozi w’Akarere ka Bugesera, Mutabazi Richard, yavuze ko iki kigo cybatswe kugira ngo gifashe ababyeyi batuye Kanzenze kwigishiriza abana babo hafi bitandukanye na mbere ngo kuko bakoraga ingendo ndende bajyana abana kwigira kure.
Ati: “Ni ikigo gishya, bivuze ko kigiye kugabanya ingendo abana batuye muri kariya gace bakoraga bajya kwiga ku bindi bigo byari bisanzwe bihari, ubu hari abana 780, bivuze ko mbere bajyaga kure, biragabanya ingendo rero abana bakoraga, binatume abana bato batangira muwa mbere batangirira igihe.”
Yakomeje avuga ko hari abatinyaga ingendo ndende z’abana bigatuma babatangiza ishuri batinze, ahamya ko ubwo babonye ikigo hafi yabo bigiye gutuma abbabyeyi batangiriza abana igihe.
Meya Mutabazi yanavuze ko ikindi iki kigo kizafasha ari ukugabanya ubucucike mu bindi bigo ngo kuko wasangaga mu bigo byegereye iki kigo gishya wasangaga hari ubucucike bw’abana benshi.
Kuri ubu Akarere ka Bugesera mu ngengo y’imari y’umwaka warangiye muri Kamena 2021 hubatswe ibyumba by’amashuri 878 harimo ibyubatswe na Leta ndetse n’ibindi byubatswe ku bufatanye na Banki y’Isi.
