Umunsi Mpuzamahanga w’umugore wo mu cyaro mu Karere ka Bugesera wizihijwe mu Murenge wa Ngeruka haremerwa amwe mu matsinda y’abagore bo mu byaro mu rwego rwo kubafasha kwiteza imbere, ibikoresho bahawe bikaba bifite agaciro ka miliyoni 14 Frw.
Kuri iki Cyumweru tariki 15 Ukwakira 2023, nibwo ubuyobozi bw’Akarere n’abahagarariye abagore bifatanyaga n’umurenge wa Ngeruka mu kwizihiza uyu munsi Mpuzamahanga.
Kuri uyu munsi amatsinda atandukanye y’abagore yatewe inkunga y’ibikoresho bitandukanye bibafasha mu bikorwa byabo bya buri munsi. Mu bikoresho bahawe birimo amagare abafasha gukora ingendo, amatungo magufi n’ibikoresho byo mu buhinzi byahawe abibumbiye mu matsinda akora ubuhinzi n’ubworozi, amashyiga aronderereza ibicanwa ndetse n’ubundi bufasha bugamije guteza imbere umugore wo mu cyaro.
Ibikoresho byahawe amatsinda yo mu murenge wa Ngeruka ahizihirijwe uyu munsi, bifite agaciro ka Miliyoni 14 n’ibihumbi 65 FRW.
Umuhuzabikorwa w’Inama y’igihugu y’abagore mu Karere ka Bugesera Mutumwinka Imerde yatungiye agatoki abagore bo muri aka Karere amahirwe ari mu kwibumbira mu matsinda agamije iterambere ngo kuko bibongerera imbaraga zo gukuraho inzitizi zikibangamiye iterambere ry’umugore wo mu cyaro.
Nyiramahirwe Berthilde wo mu Murenge wa Ngeruka ari mu bagore bibumbiye mu matsinda yo kuboha imitako no kudoda imyenda, yavuze ko we na bagenzi be byabateje imbere kandi bamaze no kwiyungura ubumenyi ku buryo batagifite imyumvire yo kuba abantu basigaye inyuma mu iterambere no mu yindi mibereho iranga abasirimu.
Mbonimpaye Antoinete ubarizwa mu itsinda ry’abagore n’abakobwa bafite ubumuga rikorere mu Murenge wa Ngeruka ashima amahirwe abagore bahawe yo gukora imishinga ibateza imbere ndetse bakanabiterwamo inkunga mu buryo butandukanye.
Ati: “Dushima uburyo rwashyiriweho twe nk’abagore by’umwihariko abafite ubumuga mu kudushyigikira mu gukora imishinga iduteza imbere nk’iyo kudoda, kuboha, iy’ubuhindi n’ubworozi n’indi itandukanye; byose babidukorera mu rwego rwo gushyigikira umugore no kubaka umuryango nyarwanda.”
Umuyobozi w’Akarere ka Bugesera Mutabazi Richard nawe akangurira abagore kwiteza imbere binyuze mu gukora imishinga ibyara inyungu nk’iy’ubuhinzi, ubukorikori n’iyindi.
Meya Mutabazi yashimiye kandi abamaze gutera intabwe mu gukora ibikorwa bibabyarira inyungu babikorera mu matsinda y’abagore.
