Abaturage bo mu Karere ka Bugesera baravuga ko babangamiwe n’umunuko uturuka mu ruganda rwa Kigali Leather rutunganya ibikomoka ku mpu, bagasaba ko iki kibazo cyashakirwa umuti cyangwa bakimurwa.
Ibi babigaragaje nyuma y’aho uru ruganda ngo rurekurira imyuka mu kirere mu gihe bari gusukura impu zabo bikabagiraho ingaruka kugeza ubwo bamwe banananirwa kurya bagatumba kubera uyu munuko.
Bamwe mu baturage baganirirye na RBA dukesha iyi nkuru bavuze ko muri uru ruganda haturukamo imyotsi ikwira ikirere cyose ndetse n’umunuko ku buryo bafite impungenge yuko byabagiraho ingaruka.
Mukampenda Annonciate avuga ko uru ruganda rwubatswe mu irembo rye avuga ko kuva rwatangira gukora imyotsi n’umunuko biruturukamo bitakunze kumworohera.
Ati: “Ni ibintu by’impu bacana hakavamo ibinuka cyane bikaba byanakubuza kurya.”
Undi muturage yagize ati: “Hari ukuntu iriya myotsi izamura umunuko mwinshi, hari n’ukuntu bapfundura ikintu kimeze nk’igifirigo hakaza umwuka mubi cyane cyane, twebwe twarabyakiriye kuko ntacyo twabikoraho.
Umuyobozi wungirije ushinzwe imari no gutsura umubano mu ruganda rwa Kigali Leather, yavuze ko umwotsi uzamurwa n’inkwi bacana naho umunuko wo ngo ni uwuturuka ku mpu bakoresha, yavuze ko ibi bibazo byose bari kubishakira ibisubizo ngo batumije umuti ushobora guhangana n’uwo munuko.
Umuyobozi w’Akarere ka Bugesera Richard Mutabazi we yavuze ko ubusanzwe bakurikiranira hafi uru ruganda kuko atari ishuro ya mbere ruvuzweho ibintu nk’ibi bitari byiza, yavuze ko mu gihe hari ibyo batakoze neza bagomba gukurikiranwa gusa ku kijyanye no kwimura abaturage baturiye uru ruganda ho yabahakaniye.
Ange Manishimwe usanzwe akora mu bijyanye no kubungabunga urusobe rw’ibinyabuzima asanga ubundi hagati y’uruganda n’abaturage hakabayemo intera ingana na kilometero ebyiri mu rwego rwo kwirinda ko bandura indwara zifata mu myanya y’ubuhumekero.
Yavuze ko muri iyo ntera ubundi haba hagomba guterwamo ibiti kugira ngo ya myuka mibi ituruka mu nganda ifatwe mu biti biyibyazemo umwuka mwiza.
Uruganda Kigali Leather Ltd rwatangiye rutunganya impu rukazohereza mu Bushinwa, nyuma leta yarusabye gushinga uruganda rukora ibikomoka ku mpu zo mu Rwanda ari nayo mpamvu rukora ibirimo inkweto, imikandara, amasakoshi n’ibindi.
