Ku bufatanye n’umufatanyabikorwa w’Akarere, ‘Plan International’ Ubuyobozi bw’Akarere bwatanze ibikoresho birimo imashini zidoda n’ibikoresho byo gutunganya imisatsi ku bakobwa 47 babyariye iwabo batarageza imyaka y’ubukure.
Ubwo yitabiraga igikorwa cyo gushyikiriza ibikoresho uru rubyiruko kuri uyu wa Kabiri tariki 30 Ugushyingo 2021, Umunyamabanga Nshingwabikorwa w’Akarere ka Bugesera Mugiraneza David yasabye abahawe ibikoresho kubibyaza umusaruko kuko bishoboka ko ariyo nzira yabo yo kugera ku bukire bifuza.
Ati: “Ibyo Imana yaguteganyirije biracyahari; niba uzakira inzira yawe ishobora kuba iri muri izi mashini, rero muzikoreshe neza.”
Uyu muyobozi kandi yasabye aba bakobwa babyaye batarageza imyaka y’ubukure kutararikira ibyo badafitiye ubushobozi, ahubwo bakabyaza umusaruro ubufasha bahawe bityo bakazigeza ku byo bifuza.
Mugiraneza yanagarutse ku babyeyi b’aba bakobwa abasaba gukomeza kubitaho, bakabakebura ntibazongere kurangara ngo basubire mu bishuko.
Ati: “Ibyabaye kuri aba bana, byarabaye kandi byabaye amateka. Mubafashe rero ibi bikoresho bahawe babibyaze umusaruro, ariko kandi baracyari batoya mumenye niba yagiye ku kazi, niba yarangaye umuhwiture.”
Abahawe ibikoresho bashimiye Plan International ku nkunga yabateye, basezeranya Ubuyobozi bw’Akarere ka Bugesera ko batazapfusha ubusa ibi bikoresho bahawe.
Furaha Adelphine ufite imyaka 18 ni umukobwa wabyariye iwabo watewe inda atarageza imyaka 18 y’ubukure; yahawe imashini idoda imyenda maze avuga ko agiye kuyibyaza umusaruro ikamufasha kurera umwana we no kwiyitaho mu mibereho ye ya buri munsi.
Ati: “Iyi mashini mpawe ngiye kuyibyaza umusaruro niteze imbere mpindure imibereho. Nyuma yo kwigishwa nkanahabwa iki gikoresho, ntekereza ko ntazongera gushukwa ngo mbe nakongera kubyara ntabiteguye.”
Bumanzi Alice ni umukozi wa Plan International mu Rwanda yasabye aba bakobwa babaye ababyeyi bakiri bato kwirinda ibishuko,
Ati: “Umuntu rero wese wumva ari mu nkundo zidafite icyerekezo muri abangaba, namugira inama yo kwifata kuko nibwo buryo dufite bwonyine bwizewe.”
Mu Karere ka Bugesera hakomeje ibikorwa byo kubakira ubushobozi abana b’abakobwa baba baratewe inda batarageza imyaka y’ubukure, mu rwego rwo kugira ngo biteze imbere mu mibereho yabo ya buri munsi.
Iki ni igikorwa kibaye ubugira kabiri mu Kwezi k’Ugushyingo 2021, nyuma y’ikindi kiherutse kuba nacyo cyo gutanga imashini zidoda ku rubyiruko rw’abakobwa rwahuye n’ibibazo byo kubyara rutarageza imyaka y’ubukure.
