Polisi y’u Rwanda yatangaje ko abantu 10 bagwiriwe n’ikirombe gicukurwamo amabuye yo kubaka mu Kagari ka Kanzenze, Umurenge wa Ntarama mu Karere ka Bugesera, babonetse bose bamaze gupfa nyuma y’ibikorwa byo kubashakisha byamaze amasaha menshi.
Iyi mpanuka yabaye ku wa 9 Nyakanga 2026, ubwo iki kirombe cyaridukaga kigahitana abari barimo bagikoreramo. Nyuma yo kubona amakuru yatanzwe n’abaturage ko abantu 10 bari binjiye muri icyo kirombe, inzego z’umutekano zahise zitangira ibikorwa byo kubashakisha.
Inkuru yabanje: Bugesera: Abaturage 10 bagwiriwe n’ikirombe
Umuvugizi wa Polisi y’u Rwanda mu Ntara y’Iburasirazuba, SSP Hamduni Twizeyimana, yavuze ko imibiri y’abo bose yabonetse mu masaha y’ijoro.
Yagize ati: “Nyuma y’amakuru twahawe n’abaturage yagaragazaga ko abari bagiye mu kazi mu kirombe bageraga ku 10, hatangiye ibikorwa byo kubashakisha aho imibiri yabo yabonetse mu masaha y’ijoro. Bari abagabo icyenda n’umugore umwe, bose bari bapfuye. Imirambo yabo yahise ijyanwa ku Bitaro bya Polisi bya Kacyiru.”
Polisi y’u Rwanda yihanganishije imiryango yabuze ababo muri iyi mpanuka, inasaba abakora ibikorwa by’ubucukuzi kurushaho kwita ku mutekano kugira ngo hirindwe impanuka nk’izi.
SSP Twizeyimana yagize ati: “Icya mbere ni ukwihanganisha imiryango yabuze ababo muri iyi mpanuka. Icya kabiri ni ubutumwa ku bakora iyi mirimo y’ubucukuzi, aho tubibutsa ko bakwiye kujya bakora ubugenzuzi buhoraho bifashishije abahanga (engineers) muri ibi bikorwa kugira ngo hasuzumwe kenshi ubukomere n’ubworohe bw’ubutaka buri gukorerwaho. Ibi bifasha mu kwirinda cyangwa kugabanya impanuka nk’izitwara ubuzima bw’abantu.”
Polisi yavuze ko iperereza rikomeje kugira ngo hamenyekane icyateye iyi mpanuka, mu gihe inzego zibishinzwe zikomeje gukangurira abakora ubucukuzi gukurikiza amabwiriza y’umutekano mu kazi.
