Urubyiruko rwo mu Murenge wa Karenge mu Karere ka Rwamagana rwatangije umushinga wo kubaka ikibuga cy’imikino y’amaboko, ibikorwa byo kubaka iki kibuga biteganyijwe ko bizasozwa mu kwezi kwa Gicurasi 2022.
Urubyiruko rwo mu Murenge wa Karenge mu Mudugudu wa Karenge rwakusanyije ubushobozi batunganya ikibuga k’imikino y’amaboko (Basketball na Volleyball), ni ikibuga bavuga ko kizabafasha kwidagadura no kuzamura impano.
Mugiraneza Edouard ni umwe muri aba bishyize hamwe, yagize ati: “Twari dukeneye imyidagaduro nk’urubyiruko, uruhare rwacu nk’urubyiruko twararutanze dukora imiganda, dukusanya n’amafaranga kugira ngo iki gikorwa gishoboke.”
Uru rubyiruko rwemeza ko rwakoze ibishoboka byose mu mikoro yarwo macye rurasiza, ndetse ubu harimo amabuye yo gutegura iki kibuga, Murenzi Nicolas nawe ni umwe mu rubyiruko wagize uruhare mu gutegura iki kibuga, yakomeje.
Agira ati: “Ngendeye ku mbaraga urubyiruko rwashyize muri kiriya kibuga, dufite umwete wo kuzamura siporo ya Basketball na Volleyball kuko hano wasangaga dufite umupira w’amaguru gusa, hari abana bafite impano zitandukanye zabuze aho zigaragarira”
Uru rubyiruko rwmeza ko iki kibuga kizabafasha mu gukundisha bagenzi babo imikino, no kubarinda kwishora mu biyobyabwenge, ikindi ngo ni uko n’abantu bakuze bazikoresha iki kibuga mu kwigorora ingingo mu gihe bakoze siporo ya bose.
Umunyamabanga Nshingwabikorwa w’Umurenge wa Karenge Ntambara Emmanuel yemeza ko iki gikorwa cyashyigikiwe n’abandi batari urubyiruko gusa, yagize ati: “Dufite abantu bakomoka i Karenge baduteye inkunga, by’umwihariko urubyiruko ruri mu bakorerabushake nabo bagize icyo baduha buri wese hari icyo yigomwe kugira ngo iki kibuga gitangire gutunganywa.”
N’ubwo aba bitanze ariko haracyari byinshi byo gukorwa ndetse ngo batangiye kugenda begera ababaha ubufasha kugirango iki gikorwa kizabe cyarasojwe muri Gicurasi 2022, ni ikibuga kizaba kinafite amatara ku buryo n’igihe cy’umugoroba cyazajya gikoreshwa.
Umuyobozi wungirije w’akarere ka Rwamagana ushinzwe imibreho y’abaturage Umutoni Jeanne abajijwe n’umunyamakuru wa MUHAZIYACU kucyo akarere kafasha uru rubyiruko yemeje ko agiye gukurikirana iki kibazo kugira ngo barebe ko hari ubufasha bahabwa.
