Ubuyobozi bw’Akarere ka Gatsibo buvuga ko bwagiye bubona kenshi raporo y’Ikigo cy’Igihugu cy’Ubuzima (RBC) igaragaza ko ubwandu bushya bwa Virusi Itera SIDA buri kwiyongera cyane cyane mu rubyiruko, akaba ari yo mpamvu hafashwe ingamba zo guhangana n’icyo kibazo.
Umuyobozi w’Akarere ka Gatsibo wungirije ushinzwe lmibereho myiza y’abaturage Mukamana Marceline, yabwiye MUHAZIYACU ko hagiye gukorwa ubukangurambaga buhereye mu bigo by’amashuri kuko ariho hinganje urubyiruko.
Yagize ati: “Ingamba twafashe ni ugukora ubukangurambanga tuganiriza urubyiruko, hari raporo ya RBC igaragaza ko ubwandu bushya bwa Virusi Itera SIDA buhari, ariko kandi bugaragara cyane mu rubyiruko. Turimo gukorana n’ibigo by’amashuri bitandukanye, turizera ko ubutumwa tubaha buzabafasha bugire icyo bubamarira ubwabo.”
Visi Meya Mukamana avuga ko ubukangurambanga bukomeje mu bigo by’amashuri bashishikariza abayobozi ndetse n’abarimu kurwanya icyorezo cya SIDA.
Yavuze ko hari abarimu kuri buri bigo by’amashuri bashinzwe ubwo bukangurambaga kugira bagabanye ubwandu bwa Virusi itera SIDA.
Ati: “Muri ibyo bikorwa tuzagerageza kugaruramo (Club-Anti SIDA) amatsinda arwanya SIDA kandi turizera ko bizatanga umusaruro.”
Visi Meya Mukamana yibukije abayobozi bayobora ibigo by’amashuri ndetse n’abarimu ko ntawe ukwiye guha akato umunyeshuri ufite ubwandu bwa Virusi Itera SIDA, kandi bakigisha abanyeshuri ko uwanduye na we ari umuntu nk’abandi.
Gakwiye John Peter, uyobora ishuri ry’imyuga n’ubumenyi ngiro rya St Josephine Muhura, ryo mu Murenge wa Muhura muri aka Karere ka Gatsibo avuga ko igihe bamenye ko hari abanyeshuri bafite ubwandu bwa Virusi itera SIDA babafasha kabumvisha ko nyuma yo kwandura ubuzima bukomeza.
Ati: “Ku kigo nyoboye abanyeshuri tumenye ko bafite ubwandu bwa virusi itera SIDA tubaba hafi kandi tukabaganiriza tubaha inama zishoboka zose, tubaremamo icyizere cy’ubuzima.”
Gakwiye yakomeje ati: “Hari umunyeshuri uba ufite icyibazo nk’icyo, ugasanga aritinya akiha akato ubwe, akaba atashobora kuvuga ko afite imiti igabanya ubukana cyangwa se ngo aze akwegere akubwire ko afite igihe agiye kuyinywa, hari n’uwaba ayifite agatinya kuyifata bagenzi be bamureba, ibyo bikamutera ipfunwe, akumva arihebye, ariko iyo tubimenye turamukurikirana kandi tugatanga ubujyanama ndetse n’ikindi cyose yakenera tukamufasha.”
Nyirarukundo Sarah na Usanase Adeline ni abanyeshuri biga Muri GS Muhura, bavuga ko biganye n’umunyeshuru wari ufite virusi itera SIDA bakabona igihe cyose ahora yigunze atiga neza ahora atsindwa mu ishuri, baje kumwegera bamubaza ikibazo afite ababwira ko yanduye iyi virusi.
Bati: “Dukomeza kumuba hafi tumwereka urukundo, uwo munyeshuri yumva ko ari kimwe natwe ubu asigaye ayiga neza kandi agatsinda.”
Manirumva Samuel wiga muri Lycée de Muhura we yagize ati: “Ntabwo guha akato umutu wanduye virusi itera SIDA bikwiye. Kumuha akato ni ikosa rikomeye cyane, nk’umunyeshuri ifite SIDA iyo ahawe akato bimugiraho ingaruka bigatuma atakaza icyizere, agahangayika, akumva ko ntacyo ashoboye ibyo bigatuma yiga nabi atsindwa. Rero mu gihe twebwe abanyeshuri igihe tubonye mugenzi wacu ufite ubwo burwayi twirinda kumuha akato ahubwo tukamurememo icyizere cy’ ejo hazaza.”
Mu mwaka wa 2023 mu Karere ka Gatsibo habaruwe abari hagati y’imyaka 15 na 39 banduye Virusi itera SIDA ku kigero cya 1.8%.
Ubukangurambaga burakomeje, aho Ubuyobozi bw’Akarere ka Gatsibo buvuga ko atari mu rubyiruko gusa, n’aho abaturage bateranye bazakomeza kwibutswa kurwanya no kwirinda icyorezo cya SIDA.
