Mu mwiherero w’iminsi ibiri abakora mu nzego z’uburezi mu Karere ka Kirehe barimo abayobozi b’ibigo by’amashuri byose byo muri aka Karere n’abashinzwe uburezi mu mirenge bagiriye mu Karere ka Ngoma hagaragarijwemo uburyo imiyoborere myiza y’ibigo ituma gutanga uburezi bufite ireme bishoboka.
Biri mu byibanzweho ku munsi wa mbere w’uyu mwiherero watangiye tariki 30, urasozwa kuri uyu 31 Kanama 2023, aho ufite intego igira iti “Imiyoborere iboneye mu mashuri, inkingi y’ireme ry’uburezi budaheza”.
Abakora mu nzego z’uburezi muri @KireheDistrict barimo abayobozi b’ibigo by’amashuri yose(134), abashinzwe uburezi mu mirenge n’abafatanyabikorwa mu by’uburezi bari mu mwiherero w’iminsi ibiri i Ngoma ugamije kurebera hamwe ibyakozwe mu burezi, ibigomba kunozwa no gufata ingamba. pic.twitter.com/ITqZ272BPz
— MUHAZI YACU (@muhaziyacu) August 30, 2023
Mukandayisenga Janviere, Umuyobozi w’Akarere ka Kirehe wungirije ushinzwe imibereho myiza y’abaturage yabwiye MUHAZIYACU ko impamvu y’uyu mwiherero ari ukuzamura imiyoborere y’ibigo by’amashuri kugira ngo intego yo gutanga uburezi bufite ireme igerweho.
Ati: “Iyo ikigo kiyobowe neza n’umusaruro uboneka ari mwiza, ishuri rigatsinda. Uyu mwiherero uje turi hafi gutangira umwaka w’amashuri mushya kugira ngo tugire ibyo twumvikanaho, twisuzume uyu mwaka udushoje; tunahige imihigo y’uyu mwaka mushya kugira ngo koko imiyoborere myiza n’ikifuzwa ariryo reme ry’uburezi rirusheho kugerwaho.”
Bamwe mu bayobozi b’ibigo by’amashuri bagaragaza ko uyu mwiherero ari umwanya mwiza wo kwisuzuma, kwigiranaho, gufata ingamba zo kunoza imikorere, no kurushaho gutanga uburezi n’ubumenyi bifite ireme.
Nirere Vestine, Umuyobozi w’ishuri ry’Utunyange riherereye mu Murenge wa Kirehe yagize ati: “Bigaragara ko iyo muri ikipe muri hamwe haba harimo abantu batandukanye mu bushobozi, rero hari ubwo umuntu yibazaga ati ko mbona abanyeshuri banjye basiba cyane, nkaba mbona kugaburira abana ku ishuri bimvuna nabigenza nte; ubu hano twaje kwigiranaho kandi uyu mwiherero turawuvanamo byinshi byiza biturutse kuri bagenzi bacu, ku bayobozi bacu; bizatuma turushaho gutanga uburezi bufite ireme.”
Bigirimana Emmanuel, Umuyobozi wa EP Kanshongwe mu Murenge wa Nyamugali yagize ati: “Twahuraga n’imbogamizi mu bijyanye no kugaburira abana ku ishuri kuko hari ababyeyi bamwe badatanga umusanzu wabo usabwa; ubu rero tugiye kunoza imikorere, dukorane n’abayobozi b’Imidugudu n’ababyeyi ku buryo tugiye kunoza byinshi kuko hari byinshi twigiye muri uyu mwiherero; ku bijyanye n’imitsindire nabyo mu mwaka ushize twari turi kuri 70% kandi intego ni ugutsindisha neza 100%.”
Mukunzi Emile, Umuyobozi w’urwunge rw’amashuri rwa Kigina umwe mu batangwaho urugero mu bijyanye n’imiyoborere n’imicungire myiza y’ikigo ayobora muri rusange, yagize ati: “Buriya ibintu byose dukwiye kubigira ibyacu, kuko nabonye iyo ubyinjiyemo, ukabikora neza bitanga umusaruro ku mpande zose no ku iterambere ry’Igihugu; kuko nk’ubu mu kigo cyacu harimo umwuka mwiza mu nzego zose, kugaburira abana ku ishuri duhagaze neza no ku bijanye n’imitsindishirize.”
Mugenzi Ntawukuriryayo Leon, Umuyobozi w’ishami rishinzwe iterambere n’imicungire y’abarimu mu rwego rw’Igihugu rushinzwe uburezi bw’ibanze(REB) yavuze ko hari ibintu bitanu bikwiye kuranga umuyobozi w’Ikigo cy’ishuri mwiza.
Muri ibyo yavuzemo ko uwo muyobozi agomba kugira icyerekezo cy’ishuri akagisangira n’abo afatanyije nabo uhereye ku barimu, abanyeshuri n’ababyeyi, kuyobora imyigire areba ko abana bafite ibikoresho, biga uko bikwiye n’ ibyo bakeneye, kuyobora imyigishirize areba imikorere y’abarimu; no kuyobora ikigo abyitayeho yita ku gukorana n’ababyeyi cyangwa umuryango mugari.
Yakomeje agira ati:”Ubundi umuyobozi w’ikigo cy’ishuri iyo afatanyije n’ababyeyi bagera kuri byinshi bana barira ku ishuri bose, nta mwana ushobora guta ishuri. Na rya reme ry’uburezi ni urugendo, kandi ni urukomatanye rw’ibintu byinshi, harimo aho abana bigira, ibikoresho, abarimu bashoboye, imiyoborere myiza, kuko ushobora kuba ufite byose ya miyoborere itaba ari myiza ba bana ntibabashe kumenya gusoma, kuko umuyobozi atakurikiranye ya myigishirize y’abarimu”.
Mu ishusho y’uko Akarere ka Kirehe kashoje umwaka ushize wa 2022-2023 gahagaze mu bijyanye n’uburezi mu bigo by’amashuri 134 bikabarizwamo habariwemo aya Leta, afashwa na Leta n’ayigenga; mu mashuri abanza uwo mwaka warangiye mu banyeshuri 101,566 abegera 118 barataye ishuri, mu mashuri yisumbuye mu banyeshuri 23,865 abagera kuri 43 bari barataye ishuri, mu gihe mu bigo byigisha imyuga(TSS) mu banyeshuri 1,649 umwe ari we umwaka warangiye atakiga.
Mu bijyanye n’imitsindire, ibipimo biheruka bigaragaza ko mu mashuri abanza mu Karere ka Kirehe abanyeshuri batsinze ku gipimo cya 89%, mu cyiciro rusange (tronc commun) ku gipimo cya 83%, naho abasoza amashuri yisumbuye imibare iherutse igaragaza ko bari batsinze kuri 95.1%.
