Irushanwa ry’umupira w’amaguru mu mirenge ryitiriwe Umukuru w’Igihugu Kagame Cup ryasubukuwe mu Ntara y’Iburasirazuba imirenge yabaye iya mbere mu turere iri buhure hashakwa ikipe yaba iya mbere ku rwego rw’Intara.
Iyi mikino irabera ku bibuga bitandukanye byo mu turere kuri uyu wa Kane tariki ya 27 Mata 2023.
Akarere ka Nyagatare gahagarariwe n’amakipe abiri mu bagabo, Umurenge wa Karangazi n’Umurenge wa Rwimiyaga naho mu bagore Nyagatare ihagararirwe n’umurenge wa Karama.
Biteganyijwe ko Umurenge wa Rwimiyaga ukina n’Umurenge wa Mukarange kuri sitade ya Nyagatare, Umurenge wa Karangazi ukine n’Umurenge wa Ngarama. Umurenge wa Gashora urakina n’Umurenge wa Gishari mu gihe ku kibuga cya Ngoma hahurira ikipe y’Umurenge wa Mugesera ihakinira n’Umurenge wa Nasho.
Umukozi w’akarere ka Nyagatare ushinzwe urubyiruko, umuco na siporo Nkurunziza Aimable, avugako amakipe yo muri aka Karere yiteguye kwitwara neza.
Aganira na MUHAZIYACU yagize ati” turi mu myiteguro kandi bimeze neza n’amakipe yacu yiteguye neza, tugomba gutsinda, turasaba abafana kuza ari benshi gushyigikira amakope yacu”
Uwitwa Kubahoniyesu John akaba umufana wa Karangazi avugako bakeneye gutwara iki gikombe.Yagize ati” njyewe mfana Karangazi, kandi twariteguye tugomba gutwara iki gikombe”
Mutimucyeye Annet wa Rwimiyaga yemeza ko ikipe yabo ikomeye cyane biteguye gutsinda. Yagize ati” Rwimiyaga yacu irakomeye twatwaye igikombe cy’Akarere turashaka gukomeza kugera ku rwego rw’igihugu”
Aya marushanwa y’Umurenge Kagame Cup yaherukaga gukinwa mu mwaka wa 2019. Ku rwego rw’Intara yari yatwawe n’ikipe y’umurenge wa Matimba mu Karere ka Nyagatare, ibi bikaba aribyo byatumye aka Karere gahagararirwa n’amakipe abiri muri iri rushanwa.
