Abana basaga 300 bo mu turere twa Bugesera, Ngoma, Rwamagana na Kirehe basubijwe mu ishuri banahabwa impuzankano n’ibikoresho by’ishuri mu gihe cy’icyumweru cyahariwe uburezi mu itorerero rya ADEPR ururembo rwa Ngoma.
Ibi byagaragajwe kuri uyu wa kabiri tariki ya 21 Kamena 2022 mu muhango wo gusoza icyumweru cyahariwe uburezi mu turere tugize Ururembo rwa Ngoma cyatangiriye mu Karere ka Bugesera tariki ya 13 Kamena gisorezwa mu Karere ka Ngoma tariki ya 21 Kamena 2022.
Umushumba w’itorero rya ADEPR Ururembo rwa Ngoma Kananga Emmanuel, ahamya ko iki cyumweru cyatanze umusaruro mu kubahiriza no gufatanya na Leta gushyira mu bikorwa politiki y’uburezi kuri bose, aho bashoboye kugarura ku mashuri umubare munini w’abana batigaga.
Ati: “Dusoje iki cyumweru tubashije kugarura abana 300 ku mashuri mu rurembo rwose, bikaba ari intangiriro nziza kuba bashoboye kwegerezwa abarimu mu mpera z’igihembwe, ariko bizatuma habaho kubakurikirana kuko icyambere ni ukubagarura nk’intambwe yambere kandi turizera ko amasomo bazayakurikita neza.”
Umuyobozi w’Akarere ka Ngoma wungirije ushinzwe imibereho myiza y’abaturage, Mukayiranga Gloriose, yasabye itorero rya ADEPR gukomeza kwita kuri gahunda za Leta ziteza imbere uburezi.
Yagize ati: “Turabasaba gukomeza kwita kuri gahunda za Leta zikomeza ziteza imbere ireme ry’uburezi, harimo kugaburira abana ku mashuri, gufasha abatishoboye no gufatikanya kugarura abana ku ishuri; tubashimira cyane kuri iki gikorwa bakoze muri iki cyumweru, tunabasaba ko twakomeza gufatanya kugira ngo abana bose babashe gukomeza kwiga. Rero turifuza uruhare rwa buri wese mu bakristu no mu baturage muri rusange.”
Uyu muyobozi yakomeje ashishikariza abana gukunda ishuri ngo ntawundi murage cyangwa umunani bazabona uretse kwiga.
Ishimwe Divine, ni umwana w’umunyeshuri wiga mu kigo cy’amashuri abanz cya Gafunzo, avuga ko yishimiye umusaruro uvuye mu bukangurambaga ku burezi butumye bagenzi be bagaruwe ku ishuri.
Ati: “Nishimiye ko iki cyumweru cy’uburezi gisojwe hari abana bagenzi bange bagarutse kwiga kandi nanjye nkaba narungukiyemo ko nshobora kugira uruhare mu kubwira abayobozi cyangwa abarezi ko hari abana bataye ishuri bakaba babagarura.”
Gihozo Ivan Bruno nawe wiga mu mwaka wa gatanu mu kigo cy’amashuri abanza cya Gafunzo avuga ko mu cyumweru cyahariwe uburezi kibasigiye inyigisho zishishikariza abana kugira umuhate wo kwiga.
Ati: “Muri iki cyumweru twahawe inyigisho zitandukanye binyuze muri ‘club’ zishishikariza abana gukunda ishuri ndetse no gukandurira ababa bararitaye kugaruka bakiga.”
Itorero ADEPR Ururembo rwa Ngoma ryatanze inkunga y’ibitabo ku mashuri y’incuke arindwi n’impamyabushozi ku bigo bitanu byatsindishije neza ibizamini bya Leta, aribyo EP Gafunzo, GS Rango, La Decouverte, Le Paradis Des Anges na Umucyo Friendly School.
Mu rurembo rwa Ngoma ruhuza uturere twa Bugesera, Ngoma, Rwamagana na Kirehe habarurwa ibigo by’amashuri 218 bifashwa n’itorero rya ADEPR.
