Ubuyobozi mu Karere ka Ngoma bwagaragarije urubyiruko rwo muri aka Karere amahirwe atandukanye rushobora kubyaza umusaruro mu rwego rwo kwiteza imbere, burusaba gukoresha neza inkunga n’inguzanyo ruhabwa no kurangwa n’ubunyangamugayo mu bikorwa byarwo.
Ibi, byagarutsweho kuri uyu wa 11 Kamena 2026, mu Nteko Rusange y’Inama y’Igihugu y’Urubyiruko ku rwego rw’Akarere ka Ngoma, yari ifite insanganyamatsiko igira iti: “Rubyiruko, ubumwe bwacu ni inkingi ikomeye mu kubaka ahazaza heza h’Igihugu.”
Muri iyi nteko hagaragajwe ibikorwa bitandukanye byagezweho n’urubyiruko muri uyu mwaka wa 2025/2026, birimo gushinga amatsinda 74 y’ubwizigame afite amafaranga agera kuri miliyoni 27 Frw.
Hanatangajwe ko urubyiruko 489 rwabyariye iwabo rwahawe amahugurwa y’amezi atatu ku kwihangira imirimo, aho nyuma yaho ruzitabira amarushanwa, amatsinda azatsinda akazahabwa miliyoni 3,5 Frw kuri buri tsinda.
Hari kandi urundi rubyiruko rurimo urwasoje amasomo yo guteka rugahita rubona akazi, ndetse n’abari hafi gusoza amasomo y’ubudozi.
Umukozi w’Akarere ka Ngoma ushinzwe Iterambere n’Ishoramari, Ayinkamiye Jeanine, yavuze ko urubyiruko rufite amahirwe menshi rwakoresha mu kwiteza imbere.
Yagize ati: “Ubu, urubyiruko rufite amahirwe y’abantu babakorera imishinga kuri buri murenge kandi baba bahari. Ubu urubyiruko rufite umushinga ujyanye n’ubuhinzi baruha amafaranga menshi, hari BRD itanga ibikoresho ku bantu bize imyuga kandi bishyura macye, hari kompanyi z’urubyiruko zicunga imihanda, hari gahunda zo kwigira ku murimo, bajya muri Rwanda Polytechnic basoza kwiga bagahabwa amafaranga abafasha, hari gahunda ya VUP ifasha urubyiruko ariko badafite amafaranga, mirenge yose iyi gahunda irahari kuva mu mwaka wa 2008, ubu umuntu ku giti ke ahabwa ibihumbi 200, wishyura mu myaka ibiri ukongeraho ibihumbi bine, wayishyura neza bakaguha ibihumbi 300. Gusa tubona imbogamizi z’abayakoresha nabi. Rero izi gahunda zose ni izafasha urubyiruko kwiteza imbere.”
Yakomeje asaba urubyiruko kugira intego no gutekereza ibikorwa by’igihe kirekire.
Yagize ati: “Urubyiruko twifuza ni urubyiruko rufite inyota yo kwiteza imbere, rusigasira ibyagezweho, rushaka kubaka iki Gihugu, urubyiruko ruzavamo abakorera iki gihugu, urubyiruko rukora imishinga migari, rwiteguye gushora imari, kandi mukora ibirenze ibyo abandi bakoze.”
Ayinkamiye yanibukije urubyiruko ko amahirwe menshi atangirwa amakuru mu nzego z’ibanze no mu nteko z’abaturage, arusaba kujya rwitabira gahunda za Leta.
Yagize ati: “Mujye mwitabira gahunda za Leta, muze mu nteko z’abaturage, ibyo byose niho bivugirwa. Hari igihe haba hari inkunga ariko tugashaka urubyiruko tukarubura, ubu abantu barindwi kugeza kuri 15 iyo bahuriye ku gikorwa kimwe bahabwa miliyoni n’igice kugeza kuri ebyiri. Gusa habaho imbogamizi, aho urubyiruko ruhabwa amafaranga ngo ruyakoreshe rugahita ruyagabana umwe agaca ukwe, umwe akagenda akajya kwishakira akazi ahandi kandi yarafashe ayo mafaranga ku buryo kuyagaruza bigorana. Mukwiye kugira ubunyangamugayo mu gihe mwahawe amafaranga mukorera hamwe ku buryo akoreshwa neza amahirwe arahari kandi mukwiye kuza mukayabyaza umusaruro.”
Umuhuzabikorwa w’Inama y’Igihugu y’Urubyiruko mu Karere ka Ngoma, Safi Olivier, yavuze ko nubwo urubyiruko rukomeje kubyaza umusaruro amahirwe ruhabwa, hari bamwe bagihura n’imbogamizi zo kubona inguzanyo kubera ibibazo byo kubura ingwate.
Yagize ati: “Zimwe mu mbogamizi urubyiruko ruhura nazo ni ukuba hari abajya kwaka inguzanyo kandi usanga zisaba ingwate, ariko nanone tubakorera ubuvugizi, tunashishikariza uru rubyiruko kuba bagana ubuyobozi rugasobanurirwa ahari amahirwe nk’uko bahoze bayatwereka.”
Kugeza ubu mu Karere ka Ngoma habarurwa nibura urubyiruko 99,607.
