Ubuyobozi bw’Akarere ka Bugesera n’abafatanyabikorwa b’Akarere batanze ibihembo binyuranye ku rubyiruko rwabaye indashyikirwa mu mihigo muri iyi manda y’imyaka itanu ya 2016-2020.
Nibwo hashojwe imihigo y’urubyiruko y’umwaka ushize wa 2019-2020, runahiga imihigo y’umwaka wa 2020-2021.
Imirenge yagiye igira imyanya y’imbere mu guhigura imihigo nayo yahawe ibihembo`
Telefoni eshatu zahawe abahagarariye urubyiruko mu mirenge nk’ishimwe kubera ko besheje imihigo neza muri iyi myaka itanu.
Uhagarariye urubyiruko mu murenge wa Ririma yahawe telefoni ifite agaciro k’ibihumbi 120Frw ahabwa na mudasobwa ya Laptop, uhagarariye urubyiruko mu murenge wa Mayange yahawe ifite agaciro k’ibihumbi 100Frw na mudasobwa ya laptop.
Uhagarariye Umurenge wa Nyamata yahawe phone ifite agaciro k’ibihumbi 80Frw.
Mu mihigo 2019-2020 Umurenge wa Kamabuye wahembwe Laptop.
Mutabazi Richard, Umuyobozi w’Akarere ka Bugesera yashimiye urubyiruko n’abafatanyabikorwa ku gikorwa cyo kwisuzuma mu mihigo ati : “Igikorwa cyo kwisuzuma mu myaka itanu ni ingenzi, gitanga icyizere ku byo urubyiruko by’umwihariko bakora”.
Yabashimiye ko kuba bafite ishusho y’ibikorwa mu myaka itanu bizafasha mu ihererekanyabubasha n’abandi bazajya muri manda itaha izatangirana n’umwaka 2021.
