Bamwe mu borozi bo mu Karere ka Kayonza mu mirenge yegereye Pariki y’Akagera bahangayikishijwe n’isazi ya Tsetse isigaye iruma inka zabo ku buryo zimwe zagiye zipfa.
Aba borozi bavuga ko bari mu ihurizo kuko muri ako gace kegereye pariki ariho bororera none hakaba hajemo icyo kibazo.
Umwe muribo ati: “Tsetse irahari si ukwibeshya, hari n’inka zimaze gupfa yazirumye.”
Undi ati: “Ubu ntituzi icyo tugiye gukora kuko ni aha twororera, none ko Tsetse imeze nabi turabyitwaramo dute? Numva ubuyobozi bwadufasha muri iki kibazo kuko ziva muri Pariki y’Akagera nta handi”
Aba borozi baganiriye na TV1 bahuriza ku kuba igisubizo cy’iki kibazo cyashakirwa muri Pariki y’Akagera gusa bakavuga ko ari Leta yagira icyo ibikoraho kuko bo bibarenze.
MUHAZIYACU yahamagaye Umuyobozi w’Akarere ka Kayonza, John Bosco Nyemazi kuri iki kibazo ntiyitaba. Ubutumwa bugufi twamwandikiye tumubaza icyo bagiye gufasha aba borozi ntiyabusubije.
Muri Nzeri 2021, MUHAZIYACU yabagejejeho inkuru ko ikigo gishinzwe iterambere ry’ubuhinzi n’ubworozi-RAB, cyari cyatangije uburyo bwo gufata isazi za Tsetse zikunze kuruma inka zikayibuza kurisha mu Karere ka Kayonza mu Murenge wa Murundi.
Tsetse ni isazi yenda gusa n’izindi ariko iba itari nini cyane, ikunze kuba ahantu mu mashyamba hashyuha, mu Rwanda yakunze kugaragara mu Ntara y’Iburasirazuba aho ikunze kurya inka kuko itungwa no kuzinyunyuzamo amaraso.
Muri yo yibitsemo akandi gakoko kitwa “Tripanozoma” aka gakoko yifitemo ngo iyo irumye inka kakayigeramo igira ibibazo nk’iby’indwara y’amashoya aho igenda inanuka buhorobuhoro ikabura umukamo, ikananirwa kurisha, iyo ngo ihaka iraramburura; bikanarangira ipfuye.
Dr. Ntegeyibizaza usanzwe ari umushakashatsi muri RAB avuga ko iyo itarwanyijwe hakiri kare hari nubwo iruma inka bikayiviramo gupfa cyangwa igatuma umusaruro wayo ugabanuka cyane.
